سلام .. هههههههههه قبل لا أدخل لقيت واحد معلق بسجل الزوار يقولي ماتلاحظين كم مره تعتذرين إنك من زمان ماتكتبين ههههههه

والله مو عن بس صدق جامعتي تضغط الواحد نفسياً جداً جداً بس خلاص إن شاء الله بصير أكتب دايم حتى لو خرابيط ولا سواليف

وهذي التدوينة لكل الي يتشكون إني ما أتكلم عن نفسي واجد والي حابين يتعرفون علي يعني أكثر

طيب وشسمه بسم الله نبدأ (- ذبيحة موب تدوينة

إسمي .. سمية  عمري ٢٢ سنة .. أدرس بكلية الجبيل الجامعية ( JUC ) السنة الرابعة ( Junior )  تخصص نظم معلومات إدارية ( MIS )

أقدر أقول عن نفسي شاطرة بدراستي حمدلله ،، ولو إنه مرت علي فترات كرهت الجامعة ونزل مستواي جداً بس حمدلله الحين قاعد يرجع كما كان .. إنسانة طموحة لأبعد حد وحلمي أبدع بكل شي بالدنيا ،، ودي أتعلم كل كل كل شي وأصير أفهم كل شي حولي وما أحب شي يفوتني أو أكون جاهلة بأي مجال ممكن ..وإن شاء الله بس أتخرج ناوية أكمل دراسات عليا وأصير دكتورة آآآد الدونيا

متخرجة من مداري تحفيظ القرآن وحمدلله تربيت فيها على أيدي مربيات وأكثر من أمهات بالنسبة لي .. ماما عيدة وبعدها تخرجت من الثانوي تخصص علمي بنسبة ٩٦ ٪ أدري كانت خايسة بس عاد ماجت الفاينلز الا وأنا مطنقره ومافتحت شي

حمدلله إجتماعية درجة أولى وصداقاتي وعلاقاتي مالها حدود وأحب كل الناس ويارب كل الناس تحبني بنات جامعتي فيه من هم كثير لما يتكلمون عني كـ ( KaWaii GiRl  )  يقولون عني مغرورة وشايفة نفسي وما أدري ليش هذي السمعة الفاشلة جداً هههههههههه

أنا أكثر إنسانة متواضعة ولله الحمد وما أحب الناس المغرورة أبداً وبالعكس الي يقرب مني ويعرفني رح يكتشف عكس كذا تمامااً

الي يرسلون لي يقولون مرتبطة ولا لاء ومدري ليش يعني العبط هذا ناوين تخطبون يعني ههههههههه لاني مرتبطة ولا في علاقة ولاشي عزباء ولله الحمد

أحب بيتنا جداً وما أحب أطلع منه ( بيتوتيه درجة أولى ) صكروا علي بغرفتي + آي ماكي وأشيائي ولحد يسأل عني .. ممكن أغيب معهم أيام وأهلي مايشوفوني .. ما أحب السفر .. أكره السفر وما أحب شي يغير الروتين اليومي حقي أبداً أبداً .. أنا إنسانة لي طقوسي الخاصة اليومية وما أحب شي يغيرها !

أحب أصحى كل يوم أروح على حمامي ـوانتوا بكرامةـ أستخدم غسولي وكريماتي .. أحط فرشتي ومعجوني بمكانهم الخاص .. أمسح بمنشفتي ..

أحب بعدها ألبس روبي وأنزل أسوي لي كوبي الكوفي بنفس المق حقي .. وأحط الكوفي بالمق بنفس الملعقة عشان يصير بالضبط نفس المقياس بالملي .. لو يزيد حبة كوفي او ذرة كوفي ميت أو حبة سكر أو تنقص ممكن أتأزم وما أستمتع بالكوفي حقي هذاك اليوم .. كل شي عندي بمزآآج ويمكن هذا الي يخليني أتأزم إذا رحت مكان ثاني أو سافرت ..

لو كان عندي جامعة ،، أروح الجامعة وأفطر هناك مع سمسوم ولا هدوو بنت عمتو وصديقاتي ولا إذا كان يوم إجازة غالباً أفطر فول ولا بيض ما أحب فطور غير هذي الشيئين أو بان كيك ووافلز .. طبعاً مو أي فول يعجبني ولا زي بيض يعجبني كل شي لازم أنا أسويه بطريقتي الخاصة حسب معاييري الخاصة جداً جداً 

لو رجعت من الجامعة أحب على طول اتغدى اي شي + أكون أتفرج بالسيريز حقي الي اكون محملته قبل لا اطلع للدوام .. وأروح أنام ساعتين بالكثير ،، أقوم العصر وبرضوا كوب كوفي على مزززاجي يروقني طول اليوم .. وبعدها عالمغرب كذا لليل لو عندي اختبار ذاكرت ولو ماعندي قعدت سويت اي شي غير مفيد مثل الهذرة مع هدو ونوري عالمسن والحش في الناس والمسات بس غالباً يعني الجامعة مايتركون الواحد يصيع لازم كرف وقلة أدب :h:بعدها أنام عالساعة ١٢ ونص أو ١ الليل وهكذا

هذا سستمي اليومي الي ما أحبه أبداً يتغير ولا أتخيله يتغير ولو صار شي غير شي بيومي ممكن نفسيتي تتعب جداً ،، وهذا شي مو زين أبداً وقاعدة أعمل على التأقلم على أي سستم ثاني أو مكان ثاني خصوصاً إني كلها شوي وأعرس وبتتغير حياتي كلها فـ وش ممكن أسوي لو طلعت من غرفتي وغيرت فراشي وغيرت نومتي وقعدتي وأكلي ..!

طبيعتي هاديه غالباً ،، بس أحسني بنفس الوقت مفعمه بالحيوية والرجه أحب جداً أقعد لحالي وأنبسط كثير ..

السنة الي فاتت ٢٠٠٩ – ١٤٣٠ كانت في نظري إنقلابة في حياتي .. يمكن كل سنة أقول إنو هالسنة كانت غير وإني أحسني نضجت وعقلت والخ الخ بس هالسنة حسيت غير غير ،، أشياء كثير صارت لي خلتني أكبر كثير وحققت أشياء كثير كنت أنتظرها من زمان ..

سويت عمليتي الليزك وبعد طفولة وعمر طويل من التعذب بالنظارات صرت أحسني إنسانة طبيعية أقدر أشوف عادي مثل باقي الناس .. وحجيت ،، تجربتي بالحج خلتني أحس كل شي بالدنيا بايخ وتافه وقدرت فيها أعرف أنا وش أبغى من جد من دنيتي وإنو فيه أشياء كثير تافهه قاعدة أضيع وقتي وفكري وحياتي عشانها وبعدين !

أحسني الحين صرت كبيرة وقادرة أواجه الدنيا وأتخذ قرارات مصيرية وأنا واثقة بنفسي .. عرفت مين يستاهل أضيع وقتي معاه ومين مايستاهل ..

أدري قاعدة اتفلسف واهذر واجد بس من أول حاسه بهالفيلينغز وودي أقولها

الموهيم خلصت سواليف عني ،، والي يبي يعرف عني أكثر فيه الفيس بوك حقي والفورم سبرينق والمدونة ماتقصر

اختباراتي السبت الجاي والله يستر بس دعواتكم :y3:  وفيني بدايات فلو الله يستر بعد

هذا الموضوع كتب في 25 يناير 2010 في الساعة 11:25 م ومصنف بهذه التصنيفات: εïз سواليفي. يمكنك متابعة التعليقات على هذا الموضوع عن طريق ملف الخلاصات RSS 2.0. يمكنك أن تكتب تعليقاً, أو تعقب على الموضوع من موقعك.